موقع الشركة العراقية: خمس شغلات يسويها غير عرض الاسم والعنوان

هواي شركات عراقية تتعامل ويا موقعها مثل كارت: اسم وشعار وصورة بناية ورقم تلفون. يتصمم مرة وينسى

بس الموقع اليوم هو اول مكان يسالون بيه عن اسم شركتك، من زبون محتمل لو من لجنة تقييم لو من مساعد ذكي. والي يلكاه هناك يقرر يتصل بيك لو يكمل بحثه

راح احچيلك عن خمس شغلات لازم يسويها الموقع التعريفي. كلها طلعت من مواقع شركات بالبصرة اشتغلنا عليها

الناس تلكاك بكوكل

الموقع الحلو الي محد يلكاه ما يشتغل

كوكل يقرا الموقع بطريقة غير الزائر. يحتاج خريطة للصفحات، وبطاقة معلومات عن الشركة يفهمها محرك البحث، واشارة واضحة اي صفحة هي العربية واي صفحة هي الانكليزية

بمواقع مجموعة الصكبان بنينا هاي الاساسيات من اول يوم: خريطة الموقع وملف يوجه محركات البحث وبيانات منظمة عن الشركة واشارات اللغة

وقسنا السرعة وامكانية الوصول قبل التسليم حتى نرجع للقياس بعدين

وببعض المواقع ضفنا ملف يشرح الشركة لمساعدات الذكاء الاصطناعي. ما اوعدك انه هذا يرفع ترتيبك

اقيس قبل وبعد وما احسب شي نجاح لحد ما اشوفه بالقياس

ويفتح بسرعة على الموبايل

هواي من زوار الموقع التعريفي يفتحوه من موبايلاتهم

موقع دجلة بيه مشهد افتتاحي سينمائي واقسام تثبت وقت السكرول وانتقالات بين الصفحات. هالحركة تحتاج انضباط، فحطينا قاعدة انه الحركة ما تلمس الا خصائص الرسم الي ما تحرك مكان العناصر، حتى الصفحة ما تهتز وقت التحميل

وبالموبايل اكو شريط اتصال ثابت يوصل الزائر لرقم الشركة بلمسة وحدة

وبعدها نجرب الموقع على موبايل عادي وانترنت عادي، مو على جهاز المبرمج

ومعلوماتك تكون صح على الخرائط

هواي ناس يوصلولك من صفحة الخرائط قبل ما يشوفون موقعك

وهواي مرات نلكى صفحة الشركة على كوكل ماب بيها اسم قديم، لو لنك ما يودي لموقعها

نبدي بملف حقائق واحد: الاسم والعنوان والتلفون وساعات الدوام والموقع. كل معلومة بيه مكتوب يمها مؤكدة لو مفترضة لو مجهولة

والموقع وكل منصة ثانية تنسخ منه حرفيا

والقياس هنا مهم هم. اخذ سكرين شوت لصفحة الخرائط قبل ما تبدي حتى تقارنها بعد اشهر

اذا ما قست البداية ما راح تعرف تحسن شي لو لا

ويثبت للي ما يعرفك انك شركة حقيقية

شركة مقاولات مثل دجلة الهندسية تكسب شغلها لمن تقنع مديريات حكومية ولجان تقييم بانها قادرة

هاي اللجان ما تعرفك وتقرا الموقع بسرعة. هدفنا كان انه قدرة الشركة تبين بعشر ثواني

فبنيت للشركة سجل كامل لمشاريعها ينفلتر حسب المجال والسنة ووياه العملاء والشهادات

وللهلال المتحدة، وسمعتها قايمة على اعمال حكومية ونفطية كبيرة، بنينا موقع يعرض سجلها وشهاداتها للي يقيمها

• سجل كامل

  لمشاريع الشركة، ينفلتر حسب المجال والسنة

• وثيقة لكل معلومة

  ما ينزل بالموقع الا الي تثبته وثائق الشركة

• بوابة وحدة

  تجمع مواقع شركات المجموعة على قاعدة تقنية مشتركة

لمن تتاخر صور الشركة نفسها، نستعمل بالبداية صور مولدة بالذكاء الاصطناعي ونكول بصراحة انها توضيحية. وبعدين نبدلها بصور الشركة وافلام مشاريعها لمن توصل

وهذا هو الاتجاه الصح. الصور التوضيحية تساعد بالبداية والصورة الحقيقية هي الي تقنع

ويحچي بلغة زائره

العربي هو الاساس بموقع شركة عراقية

بس الي يقرا بالانكليزي بالاغلب شريك لو مورد لو جهة اجنبية ويحتاج صفحة تعرفه بيك بدون ترجمة اوتوماتيكية. بمواقع المجموعة خلينا العربي هو الافتراضي والانكليزي الثاني

وكل حقل بداشبورد الادارة بيه نص عربي ونص انكليزي. اذا غاب واحد منهم يطلع الثاني بدال فراغ بالصفحة

وبموقع Prektal الي يخدم مكاتب باسطنبول ولندن والبصرة ضفنا التركي لان الجمهور يحچي بيه

القاعدة عندي انه اللغة تتبع جمهورك. لا تضيف لغة للزينة لان كل لغة تحتاج احد يراجع نصها كل ما تغير شي بالشركة

والشركة تعدله بنفسها

هاي هي الشغلة الي تحدد الموقع يبقى حي بعد سنة لو لا

اذا الشركة تحتاج مبرمج حتى تغير رقم تلفون لو تضيف مشروع، موقعها راح يبقى قديم

لهذا كل موقع من مواقعنا يجي وياه داشبورد: المشاريع والخدمات والعملاء والشهادات والاخبار واعدادات الاتصال

والرسائل الي يكتبوها الزوار توصل لصندوق داخل نفس الداشبورد

ولان الداشبورد باب لموقعك، نحميه مثل ما ينحمي اي نظام. الباسوردات مشفرة، ومحاولات الدخول الفاشلة محدودة، والجلسات مسجلة

واسال دائما منو يملك حساب الداشبورد وشنو يصير بيه اذا تغير الموظف المسؤول

وتعلمنا درس مهم بالداشبوردات. البيانات الاولية الي نملي بيها الموقع تندخل وما تستبدل اي شي عدله صاحب الموقع

لو تحديث تقني رجع النصوص الاولى ومسح تعديلات الادارة، كان الادارة فقدت ثقتها بالداشبورد

الموقع الي يحتاج مبرمج حتى يغير رقم تلفون راح يبقى قديم

موقع Signature للاستشارات الهندسية مثال قريب. بنينالها موقع بلغتين وداشبورد، يعرض شغلها بسرعة وفريقها يعدله بنفسه

قبل ما تقبل التصميم

اخر خطوة هي الدومين

اخر شي يتاخر بمشاريع المواقع بالعادة هو توجيه الدومين الرسمي للموقع الجديد

لان الدومين ممكن يكون مسجل باسم شخص ترك الشركة، لو عند جهة محد يعرف شلون يوصللها

لهذا اسال صاحب الشركة من البداية: منو يملك الدومين؟ وباي حساب؟ ومنو يكدر يغير سجلاته؟

جواب هاي الاسئلة بالبداية يمنع تاخير مزعج باخر المشروع

اقرا همشلون تختار استضافة ودومين لشركتك بالعراق بدون ما تندمالسوق العراقي4 دقائق

اسئلة تسالها لمقدم الخدمة

اسال مقدم الخدمة

• خريطة الموقع والبيانات المنظمة واشارات اللغة موجودة من البداية؟
• اسم الشركة وعنوانها وساعاتها مكتوبة بمكان واحد وكل الصفحات تنسخ منه؟
• كل معلومة بالموقع الها وثيقة تثبتها؟
• اكدر اعدل النصوص والصور والمشاريع من داشبورد بدون مبرمج؟
• منو يملك الدومين وحسابات الاستضافة والايميل؟
• الموقع يشتغل بسرعة على موبايل عادي وانترنت عادي؟

الخلاصة

الموقع التعريفي شغل يندار، مو شي يتسلم وينسى

اذا الناس لكتك بكوكل والخرائط، وصدقك الي قراك، وكل زائر لكى لغته، والشركة عدلت محتواها بنفسها، فالموقع سوى الي انبنى علموده