قبل ما تطلب نظام لشركتك: أسئلة تجي قبل أي عرض سعر
الاسئلة الي اسالها لصاحب الشركة قبل ما اكتب سطر واحد وشلون اجوبتها تغير كلفة النظام ومدته اكثر من اي قائمة ميزات
باختصار
- كلفة النظام تحددها المشكلة والمستخدمين والبيانات الموجودة وما بعد التسليم، اكثر من قائمة الميزات
- اكتب مشكلتك الحالية بصفحة وحدة وسمي كل نوع من المستخدمين، قبل ما تقابل اي مبرمج
- اسال منو يستضيف النظام ومنو يملك الدومين والحسابات ووين الباك اب. هذا هو ما بعد التسليم
بهذا المقال
لمن يجيني صاحب شركة يريد نظام، بالاغلب يبدي بقائمة ميزات: تطبيق وداشبورد وتقارير وربط ويا واتساب
انا ابدي باسئلة ثانية. اجوبتها تحدد الكلفة والمدة اكثر من اي قائمة وتوفر على الطرفين اسابيع من سوء الفهم
هاي الاسئلة طلعت من مشاريع اشتغلت عليها بالعراق، قسم منها انظمة جديدة وقسم انظمة شغالة ورثتها. راح امر عليها بنفس الترتيب الي اسالها بيه
ابدي بالمشكلة الحالية قبل قائمة الميزات
السؤال الاول: شنو الي يصير هسه بشركتك ويضيع عليك فلوس لو وقت؟
اريد جواب بجملة وحدة ووياه مثال من الاسبوع الي فات. جملة مثل «الزبون يطلب بالتلفون ونص الطلبات تضيع» تفيدني اكثر من عشر صفحات وصف
بمشروع توصيل ورثته وهو شغال، بدينا بتدقيق مكتوب قبل اي اصلاح وكل ملاحظة مربوطة بدليل
لو بدينا نصلح الشكاوي وحدة وحدة، كان صلحنا الاعراض وبقى السبب
ونفس المبدا ينطبق عليك قبل ما تطلب نظام جديد. اكتب المشكلة وادلتها اول وبعدين اطلب الحل
صفحة وحدة
تكفي لكتابة المشكلة والمستخدمين والبيانات قبل ما تقابل اي مبرمج
جزء واحد
يشتغل ويا مستخدمين حقيقيين قبل ما ينبني الباقي
3ارقام
تباوع عليها كل صبح ومنها تبدي التقارير
الناس قبل الشاشات
منو راح يستعمل النظام كل يوم؟
السؤال الثاني: سميلي كل نوع من المستخدمين. صاحب الشركة والمحاسب والكاشير والسايق والزبون
كل نوع يحتاج شاشة وصلاحيات وطريقة يتعلم بيها وكل شاشة تدخل بالكلفة
فاست أوردر مثال واضح. بيه تطبيق للزبون وتطبيق للكابتن وداشبورد للمطاعم وداشبورد للادارة
الي يكول «تطبيق توصيل» يفكر بشاشة وحدة والنظام الفعلي اربع انظمة تحچي ويا بعضها
وفكر بالمستخدم الي ما يحب التقنية
بمدار كان واضح انه هواي من التجار ما يتقنون التقنية ويديرون شغلهم من الموبايل. لهذا بنيتلهم تطبيق موبايل ويا داشبورد الويب
تطبيق توصيلFast Orderتطبيق توصيل بمستوى التطبيقات الكبيرة، شغال بقضاء الصويرة بمحافظة واسط.
منو عندك يكول «اي» لو «لا» بنفس اليوم؟
السؤال الثالث يخصك انت مو المبرمج
المشروع يمر كل يوم بعشرات القرارات الصغيرة، مثل اسم حالة الطلب لو منو يشوف سعر الجملة. اذا كل قرار ينتظر اجتماع الاسبوع الجاي، المشروع راح يمشي بسرعة الاجتماع
احسن المشاريع الي اشتغلت عليها كانت ملاحظات المالك توصل بيها بعد كل جولة ونسدها دفعات. هالايقاع يمشي لان اكو احد يرد
اختار شخص واحد من طرفك بيده الصلاحية وانطي المبرمج اسمه ورقمه
شنو الموجود اليوم من بيانات؟
السؤال الرابع: وين معلوماتك هسه؟ بدفتر، لو بملف اكسل، لو برسائل واتساب، لو براس موظف قديم؟
النظام الجديد يبدي فارغ والبيانات القديمة هي الي تخليه مفيد من اول يوم
بمشاريع المنيو الرقمي نبدي من القائمة الموجودة عند المطعم اصلا. ما نبدي من الصفر ونروح مباشرة للمراجعة والتصحيح
واكو سؤال اصعب: هاي البيانات صحيحة؟
بالمواقع التعريفية عدنا قاعدة نلتزم بيها، ما نكتب الا الي تثبته وثائق الشركة نفسها. والي ما ثبت يبقى برا الموقع لحد ما صاحبه يثبته
نصيحة: ورقة حقائق وحدة
بمشاريع المطاعم نجمع الاسم والعنوان وساعات الدوام والتلفون بملف واحد. كل معلومة بيه مكتوب يمها مؤكدة لو مفترضة لو مجهولة. والموقع وكل منصة تنسخ من هذا الملف وبس
جرب نفس الشي قبل اي مشروع. راح تكتشف انه شركتك نفسها تكتب اسمها وساعاتها بطريقتين مختلفتين
اسئلة تغير الكلفة ومحد ينتبه الها
هاي الاسئلة ما تخطر على بال احد لحد ما تطلع بنص المشروع. احطها كلها على الورقة باول لقاء
كل جملة تنكال بالاجتماع تبين بسيطة ووراها قرار يغير النظام
| الموضوع | الي ينكال بالاجتماع | شنو يعني للنظام |
|---|---|---|
| الدفع | «الدفع الكتروني» | اي بوابة؟ كل بوابة الها واجهتها وطريقة تسويتها وكلفتها بالتنفيذ |
| الانترنت | «الانترنت عدنا يكطع» | الكاشير يبيع ويسجل لمن ينكطع الاتصال؟ الجواب يغير بنية النظام كلها |
| اللغة والارقام | «نريده بالعربي» | عربي بس لو ويا انكليزي؟ الارقام عربية هندية لو لاتينية؟ العملة بالدينار والوقت بتوقيت بغداد |
| الصلاحيات | «كل موظف يدخل» | منو يشوف شنو؟ صلاحيات لكل دور وسجل يبين منو غير شنو وشوكت |
| التقارير | «نريد تقارير» | اي تقارير؟ اكتب ثلاث ارقام تباوع عليها كل صبح ونبدي بيها |
| واتساب | «اربطوه بالواتساب» | رسالة تنبيه مثل رمز التحقق، لو محادثة كاملة ويا الزبون؟ الاولى بسيطة والثانية نظام لوحدها |
والدفع بالذات يستاهل وقفة. لمن تربط منصة باكثر من بوابة، كل بوابة الها واجهتها وشروط تسويتها وطريقتها بالفشل
لو عرفنا باول اجتماع اي بوابات يستعملوها زبائنك فعلا، كان التقدير طلع ادق
وعن سؤال الانترنت بالذات كتبت مقال ثاني لان جوابه يغير طريقة البناء من اساسها
وشنو بعد التسليم؟
السؤال الاخير ينساه الكل
منو يستضيف النظام؟ ومنو يملك الدومين وحسابات الخدمات؟ ووين الباك اب، واكو احد جرب يرجعه فعلا؟
بفاست أوردر احنا نستضيف النظام ونديره ونطوره، فاكو جهة وحدة تسالها لمن يتعطل شي ليلة الخميس
وبمشاريع ثانية اكو باك اب مشفر للداتابيس والصور ونجرب نرجعه على سيرفر معزول حتى نتاكد. الباك اب الي ما تجرب ما احسبه باك اب
اسال قبل التوقيع: وين يشتغل النظام، ومنو يملك مفاتيحه، وشلون ارجعه يوم يصير عطل؟
وفكر بنسخ التطبيق القديمة هم
بفاست أوردر التطبيق بيه شاشة صيانة وبوابة تجبر الي عنده نسخة قديمة كلش على التحديث. هاي تفاصيل محد يطلبها باول اجتماع، بس هي الي تنقذك باليوم الصعب
الشركة هي الي تملك الدومين والحسابات، مهما كان الفريق الي يديرها. هذا يحميك لو انتقلت لفريق ثاني بعد سنة
ورقة وحدة وبعدين عروض تتقارن
شنو تحضر قبل اول لقاء
اجمع الاجوبة بصفحة وحدة. ما تحتاج مستند ضخم. تحتاج جمل واضحة يكدر اي مبرمج يقراها بخمس دقايق
شنو تحضر قبل ما تحچي ويا اي مبرمج
شلون تقرا العروض بعد ما تجاوب
لمن يختلفون عرضين هواي بالسعر، اسال اول شي شنو افترض كل واحد منهم. بالاغلب راح تلكى انهم يوصفون شغلين مختلفين
الورقة الي كتبتها هي الي تخلي المقارنة ممكنة
انطي نفس الورقة للكل
كل مبرمج يقرا نفس المشكلة والمستخدمين والبيانات، فالافتراضات تتشابه
اطلب تقدير لكل جزء
الدفع والصلاحيات والتقارير والشغل بلا انترنت. هيچ تشوف منين اجه الفرق
اتفقوا على اول تسليم صغير
جزء واحد يشتغل ويا مستخدمين حقيقيين. الي يتهرب من التسليم الصغير راح يتاخر بالكبير
اكتبوا ما بعد التسليم
الاستضافة والدعم والباك اب ومنو يملك الحسابات
الخلاصة
النظام الزين يبدي بورقة وحدة من صاحب الشركة. الكود يجي وراها
اذا جاوبت على هاي الاسئلة قبل ما تحچي ويا احد، راح توصلك عروض تكدر تقارن بينها وراح تعرف منو فهم شغلك فعلا
مشاريع مذكورة بالمقال
اسئلة شائعة
احتاج مستند متطلبات طويل قبل ما ابدي؟
لا. صفحة وحدة تكفي: المشكلة والمستخدمين والبيانات الموجودة. التفاصيل تنكتب ويا المبرمج بعد ما يفهم شغلك
شلون اعرف انه المبرمج فهم شغلي فعلا؟
يسالك عن المشكلة والمستخدمين والبيانات قبل ما يحچي عن الادوات والاسعار. اذا بدى بالتقنيات وحدها فانتبه
منو لازم يملك الدومين وحسابات الاستضافة؟
الشركة. تتسجل باسمك وبايميلك، والمبرمج ينطى صلاحية عليها. هذا يحميك لو تغير الفريق بيوم
ابدي بنظام كامل لو بجزء منه؟
ابدي بجزء واحد حقيقي يشتغل ويا مستخدمين فعليين وبعدين ضيف. الجزء الاول يكشفلك الي ما توقعته
