ليش نبني نظام يشتغل أوفلاين
النت بالعراق ينكطع ويتاخر والشغل ما ينتظر. شلون تشتغل انظمة التفتيش الميداني وبوابات الدخول واجهزة البيع بدون اتصال، وشوكت نظامك يحتاج هذا
باختصار
- النظام الي يشتغل اوفلاين يحفظ الشغل على الجهاز اول شي ويدزه لمن يتوفر الاتصال، والموظف ما يوكف
- بنظام التفتيش الميداني الي اشتغلت عليه كل زيارة تنحفظ على الموبايل، ووقت انهاء الجولة ينرفع بس الي بعده ما اندز
- الطريقة اغلى بالبناء واصعب بالمزامنة، فما تحتاجها الا اذا التوقف يكلفك اكثر منها
بهذا المقال
انقطاع النت عندنا مو شي استثنائي. مرة الكهرباء، ومرة الشبكة مزدحمة، ومرة الموظف واكف بمكان ما توصله الاشارة اصلا
وقبل ما اصمم اي نظام ميداني او نظام بيع اسال سؤال واحد: شنو يسوي الموظف لمن يختفي الاتصال بنص الشغل؟
اذا الجواب «ينتظر»، فانا بعدني ما صممت النظام
ليش هذا يهمك وانت صاحب عمل
لمن الموظف ينتظر الشبكة انت تدفع اجر انتظاره. ولمن الزبون يوكف كدام كاشير ما يستجيب انت تخسر اكثر من الدقايق، تخسر نظرته الك
هاي الكلفة ما تطلع باي عرض سعر، بس تندفع كل يوم يتعثر بيه الاتصال
وبالشغل الميداني الموضوع اصعب. المفتش الي ما يكدر يسجل زيارته بالموقع ممكن يكتبها على ورقة، والمشكلة تبدي من هناك
شنو يعني نظام يشتغل اوفلاين
اغلب الانظمة تشتغل بهذا الترتيب: الجهاز يدز للسيرفر، والسيرفر يحفظ، وبعدها الجهاز يعرض النتيجة. اذا انكطع الخيط باي نقطة يوكف كل شي
النظام الاوفلاين يعكس الترتيب. الجهاز يحفظ شغله عنده اول شي ويكمل، وبعدين لمن يرجع النت ينقل الي انحفظ
- الموظف يسجل على جهازه
- حفظ فوري على الجهاز
- علامة: بعده ما اندز
- يرجع الاتصال
- ينرفع بس الي ما اندز
الاتصال وسيلة تنقل الشغل، مو شرط حتى يخلص
ثلاث امثلة من شغلي
اختار ثلاث انظمة اشتغلت عليها، لان المبدا يوضح بالامثلة اكثر من الشرح
المفتش الميداني
اشتغلت على الباك اند مال نظام التفتيش الميداني لهيئة الاعلام والاتصالات. المفتش يزور موقع داخل منطقة مخصصة اله، ويسجل بياناته وموقعه على الخريطة، وياخذ صور، وياخذ التواقيع المطلوبة على موبايله
ومحد يضمن ان الاشارة موجودة بالموقع
لهذا التطبيق ما ينتظر شبكة. كل زيارة تنحفظ بقاعدة بيانات محلية على الموبايل وعليها علامة «ما اندزت». ولمن المفتش يخلص جولته تنرفع بس الزيارات الي بعدها ما اندزت، وما يتكرر شي
المفتش يسجل الزيارة
الموقع والصور والبيانات والتواقيع، كلها على الموبايل
تنحفظ راسا على الجهاز
بقاعدة محلية، وعليها علامة «ما اندزت»
الجولة تستمر
الزيارة الي بعدها تبدي بدون ما تنتظر احد
تنرفع وقت انهاء الجولة
بس الزيارات الي ما تزامنت هي الي تندز للسيرفر
المدير يشوف النتيجة
تقارير حسب المدينة والمنطقة والموظف بداشبورد الويب
والرفع المتاخر اله فايدة ثانية. الصور والتواقيع ثقيلة، ورفعها بنص الجولة على شبكة ضعيفة ياخر الشغل. تاجيله لنهاية الجولة يخلي المفتش يشتغل بسرعة الموبايل نفسه، مو بسرعة الشبكة
بوابة المعرض
بنظام الدخول لمعرض IQDEX، الي اشتغلت على اغلبه، الزائر يوصل للبوابة وبيده بطاقة عليها رمز QR. تطبيق الماسح يم البوابة يقرا الرمز ويتحقق منه على نفس الجهاز بقاعدة محلية، ويحفظ سجل المسح، وبعدها يزامن لمن يتوفر الاتصال
والسبب واضح. اذا التحقق يحتاج السيرفر، فضعف الاشارة يم البوابة يعني سرة ناس واكفة تنتظر. بس لمن الجهاز يتحقق بنفسه البوابة تفتح بلحظتها، والسيرفر يعرف شنو صار بعد شوية
المحل
وعد هو نظام نقطة بيع ونظام ادارة لمحلات الاجهزة والالكترونيات، اشتغلت عليه ضمن عملي ويا Dudes Studio. البيع بيه يستمر لمن ينكطع النت ويتزامن تلقائي لمن يرجع، ويا رقم تسلسلي و IMEI لكل قطعة
والمحل ما يكدر يسد الكاشير لان الشبكة طاحت والزبون واكف كدامه
محلي اول شي
كل سجل ينحفظ على الجهاز قبل اي اتصال
وقت انهاء الجولة
موعد رفع الي ما تزامن بتطبيق التفتيش
مرة وحدة
كل سجل يوصل للسيرفر بدون تكرار
الجزء الصعب: المزامنة
الحفظ على الجهاز سهل. الصعب ان نسخة الجهاز تلتقي ويا نسخة السيرفر بدون ما يضيع شي او يتكرر. وهذا احسب حسابه من البداية
واجرب الحالة الصعبة: جهازين يسجلون شغل قبل ما اي واحد منهم يتصل، وبعدها يتصلون سوية. شنو يشوف السيرفر؟ هاي الحالة هي الي تكسر الانظمة، مو الحالة العادية
كل سجل اله رقم ينخلق على نفس الجهاز، فاذا وصل السجل مرتين السيرفر يعرفه وما يسجله مرتين. واحسن شي يقلل التعارض ان كل سجل يكون اله مالك واحد: زيارة المفتش يعدلها المفتش وحده
| البند | يعتمد على الاتصال | يشتغل اوفلاين |
|---|---|---|
| وين تنحفظ البيانات اول شي | على السيرفر | على الجهاز |
| لمن ينكطع النت | الموظف يوكف | الموظف يكمل شغله |
| الي يشوفه المدير | بلحظته | بعد المزامنة |
| كلفة البناء | اقل | اعلى بسبب المزامنة |
تنبيه: الموبايل ممكن يضيع
الجهاز الي شايل البيانات ممكن يضيع او ينسرق قبل ما يرفعها. ما اخزن عليه الا اللازم، واحميه برمز، واخلي الرفع باقرب فرصة ممكنة
شنو الي يشوفه المدير
المدير بنظام مثل هذا يتعلم يقرا تقريره بطريقة ثانية. الي يشوفه هو الي وصل لحد هسه. لهذا احرص ان الشاشة تبين اخر وقت مزامنة، حتى ما يظن ان الموظف ما اشتغل لان بياناته بعدها ما وصلت
وهذا ثمن صغير مقابل ان البيانات توصل كاملة
بين الفايدة والكلفة
ما ابني بهاي الطريقة لانها انيقة. ابني بيها لان البديل ان اعتذر لصاحب العمل عن عطل ما اله ذنب بيه
الي يميزه
- الشغل ما يوكف مهما صارت الشبكة تعبانة
- الواجهة اسرع لانها ما تنتظر السيرفر
- ما تضيع بيانات تتسجل بمنطقة بدون تغطية
الي يعيبه
- بناءه اطول واغلى من النظام العادي
- المدير ما يشوف البيانات بلحظتها
- المزامنة والتعارضات تحتاج اختبار دقيق
انت تحتاجه؟
اسال نفسك قبل ما تطلب نظام يشتغل اوفلاين
واكو اختبار بسيط اطلبه من اي مورد قبل ما اصدق كلامه: افتح التطبيق، شغل وضع الطيران، وخلص يوم شغل كامل. وبعدها رجع الاتصال وشوف شنو وصل للسيرفر، ووصل مرة وحدة لو لا
اذا جوابك «لا» على اول سؤالين، فنظام عادي يكفيك. وموقع الشركة وصفحات المعلومات ما تحتاج هذا ابد
بس اذا «اي» عليهم، فالكلفة الاضافية ثمن معقول لشغل ما يوقف، بشرط المدير يقبل بالي باخر سؤالين
الخلاصة
اسال اول شي: شنو يسوي موظفي لمن يختفي الاتصال؟ اذا الجواب «ينتظر»، فالنظام مبني لمكتب بيه شبكة مثالية، مو لشغلك انت
واذا قررت تبنيه لا تبدي بالنظام كله. اسال شنو الشي الي ما يجوز يضيع ابد، وابني حفظه اول شي. الباقي يجي بعده
مشاريع مذكورة بالمقال
اسئلة شائعة
اوفلاين يعني النظام ما يحتاج نت ابد؟
لا. يحتاجه حتى ينقل الي حفظه وتوصل التقارير للادارة، بس ما يعتمد عليه حتى يشتغل الموظف بلحظته
هاي الطريقة اغلى من النظام العادي؟
اي، لان المزامنة تحتاج تصميم واختبار دقيق. وتستاهل الكلفة بس اذا توقف الشغل يكلفك اكثر منها
شنو يصير اذا ضاع الموبايل قبل ما تنرفع البيانات؟
تضيع البيانات الي ما انرفعت اذا الجهاز ما كان محمي ومحدث. لهذا البيانات تنرفع باقرب فرصة والجهاز ينحمي برمز
