تطبيق توصيل لمدينة صغيرة: الي تعلمته من فاست أوردر بالصويرة

المدن الصغيرة ما تطلع على خريطة تطبيقات التوصيل الكبيرة

بيها مطاعم وافران وصيدليات ومحلات بقالة، بس الطلب بيها يصير بمكالمة تلفون وهواي من المكالمات تضيع قبل ما توصل

من هنا بدى فاست أوردر، تطبيق توصيل يشتغل بقضاء الصويرة بمحافظة واسط، ومركزها الكوت

لمن دخلت المشروع ما كان المطلوب ابني تطبيق من الصفر. كان اكو نظام شغال بزبائنه وكباتنه ومطاعمه

والمطلوب اطوره بدون ما اوكفه وارجع ابني التطبيقين الي يشوفوهم الناس

تطبيق توصيلFast Orderتطبيق توصيل بمستوى التطبيقات الكبيرة، شغال بقضاء الصويرة بمحافظة واسط.

شنو الي تغيره المدينة الصغيرة

بالمدينة الكبيرة الزبون يختار بين عدة تطبيقات

بالمدينة الصغيرة بالاغلب اكو تطبيق واحد ولازم يشيل المدينة كلها: مطاعم وبقالة وصيدلية وافران ومكتبة وبريد

ووياه داشبورد يديره فريق التشغيل حتى يحط العروض والاعلانات بنفسه بدون ما ينتظر مبرمج

واكو فرق اهم. بالمدينة الصغيرة الاخبار تنتشر بسرعة. غلطة وحدة بسعر طلب تحچي بيها الناس قبل ما تصلحها

لهذا اكول المدينة الصغيرة تسامحك على تطبيق بسيط وما تسامحك على سعر غلط لو طلب ضاع

شنو اسال لو كنت استثمر بتوصيل لمدينتي

التطبيق هو الجزء الي يبين بس

قبل ما تحط فلوسك اسال: منو يدير العروض كل يوم؟ منو يقرر اجرة الكابتن وشلون تتغير؟ شنو يصير لو طاح السيرفر وقت الغدا؟

هاي اسئلة تشغيل وجوابها يحدد المشروع يعيش بعد اسبوعه الاول لو لا

نظام شغال تحچي وياه اجيال من التطبيقات

اول درس للي يدير نظام شغال انه التطبيق الي نصبوه الناس على موبايلاتهم ما يموت بقرار منك

تبقى نسخ قديمة تحچي ويا نفس السيرفر اسابيع بعد ما تنزل نسخة جديدة

• 4انظمة

  تطبيق الزبون وتطبيق الكابتن وداشبورد المطعم وداشبورد الادارة

• تطبيق واحد

  يخدم المدينة كلها: مطاعم وبقالة وصيدلية وافران

• سعر واحد

  يحسبه السيرفر وكل الشاشات تعرضه مثل ما هو

يعني كل تغيير بالسيرفر لازم يكون اضافة وما يصير يكون تعديل لو حذف. والا ينكسر تطبيق على موبايل زبون ما راح يحدثه قبل اسابيع

ولهذا صاحب العمل يحسب كلفة التوافق ويا القديم بميزانيته من البداية

السعر يحسبه السيرفر وحده

اخطر شي بتطبيقات التوصيل انه التطبيق يحسب سعر والسيرفر يحسب سعر ثاني. لمن يختلفون الرقمين، لو الزبون يزعل لو الشركة تخسر

الحل انه السيرفر ينطي معاينة للسعر. السلة وصفحة الدفع يعرضون بس الي يكوله السيرفر

الي يشوفه الزبون هو الي راح يدفعه

كلفة التوصيل مو رقم واحد

كل مطعم اله سياسة مختلفة ولهذا اجرة التوصيل تنحسب لكل مطعم لوحده

القاعدة الي ادافع عنها انه عرض ترويجي من مطعم ما يندفع من جيب الكابتن

وبالطلب من اكثر من مطعم، الطلب يصير رحلة وحدة بكابتن واحد واجرتها تنحسب بقاعدة بسيطة يفهمها الزبون والكابتن والمالك

اذا ما كدرت تشرحلهم القاعدة بجملة، فهي معقدة اكثر من اللازم

اقرا همقبل ما تطلب نظام لشركتك: أسئلة تجي قبل أي عرض سعرالبزنس والاستثمار4 دقائق

الكابتن بقلب الطلب

الكابتن هو اخر حلقة بين الطلب والزبون ولهذا النظام لازم يحميه مثل ما يحمي الزبون

طلب واحد، كابتن واحد

الطلب الواحد ما يصير يروح لكابتنين

لهذا «قبول الطلب» لازم يكون عملية وحدة ما تنقسم. اول كابتن يضغط ياخذه والثاني يعرف فورا انه الطلب راح

وبالرحلات الي بيها عدة طلبات رتبت القفل بطريقة ثابتة حتى طلبين ما يعطلون بعضهم

وصار سؤالي الاول باي نظام ارثه: منو يكدر يسوي شي مو من حقه؟

الكاش بجيب الكابتن

الدفع بالتوصيل عدنا هواي مرات كاش، والكابتن يستلم الفلوس من الزبون وبعدين يسلمها للشركة

كل ما كبر الي بجيبه كبر الخطر عليه وعلى الشركة. لهذا خليت بتطبيقه حد للمبلغ الكاش الي يشيله

هاي قاعدة صغيرة الزبون ما يشوفها، بس تحمي الكابتن قبل ما تحمي حساب المالك

والمدينة الصغيرة ما تتحمل كابتن واحد يخسر ثقته بالشركة

شلون تشتغل على نظام شغال ما يصير يوكف

هاي الطريقة الي امشي عليها واكتبها لانها تفيد اي صاحب شغل يدير نظام شغال

1. ابدي بمراجعة مكتوبة

   قبل ما المس سطر واحد اكتب مراجعة بالعربي وكل ملاحظة بيها مربوطة بدليل

2. اشتغل على نسخة معزولة

   نسخة من النظام الشغال ما يوصلولها الزبائن، والاشعارات والرسائل والدفع بيها معطلة، حتى ما يوصل لزبون حقيقي اشعار تجربة

3. لا تصلح قبل دليلين

   ما اصلح مشكلة قبل ما اتاكد منها بنوعين من الادلة، مثل السجلات وبعدين التجربة على النسخة المعزولة

4. غير بالاضافة بس

   كل تغيير بالسيرفر ينضاف وما ينشال، فالتطبيق القديم يظل يشتغل

5. اكتب للمالك

   اكتب للمالك شنو تغير بلغة ما تحتاج مبرمج حتى تنفهم

نظام التوصيل الشغال ما ينسد للصيانة. تصلحه وهو يشتغل

ليش رجعت بنيت التطبيقين

رجعت بنيت تطبيق الزبون وتطبيق الكابتن بدال ما ارقعهم

بتطبيق الزبون تتبع الطلب على الخريطة، وتقييم وطلب استرجاع، ومحادثة ويا الكابتن وويا الدعم

وبتطبيق الكابتن عروض الطلبات واثبات التسليم بصورة. والكابتن يحط موبايله بجيبه وهو يشتغل، فخليت اشعار الطلب الجديد بقناة وصوت خاصين حتى يسمعه

وبتطبيق الزبون شاشة صيانة وبوابة تجبر الاصدارات القديمة على التحديث وقت الحاجة

ما انصح بنفس الخيار بكل حالة. بس لمن تكون الاساسات هي المشكلة، الترقيع ياجل الفاتورة وما يلغيها

الخلاصة

مدينة صغيرة يعني كل طلب مهم وكل غلطة تنعرف

ابني اول شي الي يخلي كل طلب يوصل بالسعر الصح وبكابتن واحد وبعدين زوق

واذا ورثت نظام شغال، اكتب مراجعتك قبل ما تغير شي واشتغل بالاضافة مو بالتعديل