أدير مطورين ووكلاء أذكياء سوية: شنو الي تغير بالكلفة والسرعة

قبل كنت ابدي اي مشروع بسؤالين: كم مطور احتاج وكم شهر ياخذ؟

هسه سؤالي تغير: كم مهمة اكدر اكتبها بوضوح ومنو راح يتاكد من نتيجتها؟

اشتغل هسه ويا مطورين وويا وكلاء ذكاء اصطناعي بنفس المشروع. وهذا مو حچي نظري، منصة مدار بنيتها بهالطريقة

راح اشرح شنو الي تغير بالكلفة والسرعة وشنو الي بقى مثل ما هو

وين زادت السرعة فعلا

زادت بكتابة الكود نفسه

منصة مدار بيها باك اند ومتجر وداشبورد للتاجر وداشبورد للادارة وتطبيق موبايل وموقع تعريفي. بنيتها كلها ويا وكلائي، والمراجعة والقرار ظلوا بيدي

وموقع دجلة الهندسية ويا لوحة التعديل مالته، هم بنيته بنفس الطريقة

• 3الى 4 وكلاء

  اشغلهم بنفس الوقت وما ازيد

• دليلين

  لازم يصيرون عدنا على السبب قبل ما نصلح اي خلل بنظام شغال

• برا البرودكشن

  الوكيل دائما على نسخة معزولة وبلا بيانات حقيقية

السرعة الي احچي عنها هي سرعة الكتابة. مو معناها انه المشروع صار يتسلم اسرع بنفس النسبة وراح اوضح ليش

ليش المشروع ما يوصل اسرع بنفس النسبة

بنظام شغال يخدم ناس حقيقيين ما يكفي تكتب الشاشات بسرعة

تبقى على موبايلات الناس تطبيقات قديمة تتصل بنفس السيرفر، فكل تعديل على السيرفر لازم يبقى متوافق وياها

هالشغل ما يسرع لان الكتابة سرعت. يسرع بس بقد ما الاختبارات تطمنا

الوكيل يكدر يكتب الاختبارات هم، بس شنو الي لازم نختبر هذا قرار يرجع لانسان يعرف وين الغلط يأثر

وين ما تغير شي

الفهم ما تغير. لازم اعرف مشكلة الزبون قبل ما اطلب من اي وكيل شي ومحد يعرفها بدالي

وبنظام شغال ورثته قضيت وقت بتدقيق مكتوب قبل اي تعديل وكان هذا اهم شي سويته

والمسؤولية ما تغيرت. اذا طلع غلط للبرودكشن، يعني للنظام الي يستعملوه الناس، فمحد راح يسال الوكيل. يسالوني انا

لهذا اخلي الفحص والمراجعة بيد جهة مستقلة عن الي نفذ

وبمدار سويت مراجعات امنية وسديت الي لكيته بيها لان الكود الي ينكتب بسرعة يحتاج عين تقراه على كيفها

الوكيل يكتب بسرعة، بس الي يسلم المشروع هو الي يجاوب لمن الكود يغلط

ونفس المبدا اطبقه لمن يكون الذكاء جزء من المنتج. في إنجازو أبني مجموعة اختبار بالعربية العراقية وأقيس بها جودة الردود قبل أن أعد أحداً بشيء.

شلون اقسم الشغل

ما اكول للوكيل «ابنيلي نظام»

اكتب خطة واحدد العقود بين الاجزاء، يعني شنو ينطي كل جزء للثاني. وبعدين اوزع مهام صغيرة، كل وحدة بملفاتها وبفحص يقرر نجحت لو لا

1. 1احدد المشكلة والقيود
2. 2اكتب الخطة والعقود
3. 3وكيل ينفذ مهمة محدودة
4. 4فحوصات واختبارات تحكم
5. 5مراجعة مستقلة
6. 6دمج وتسليم

بكل ريبو، يعني مستودع الكود، اكو ملف بالقواعد الملزمة يقراه كل وكيل قبل ما يبدي. واكو ملف للمنتج وسجل للقرارات

بمدار كتبت القرارات المعمارية ويا اسبابها، حتى ما يجي وكيل جديد ويفتح نقاش محسوم

وبين ريبوات المنصة اكو سكربتات تخلي العقود والتصميم متطابقة، فتعريف الطلب ما يختلف بين المتجر والداشبورد والتطبيق

الموديل الاقوى يخطط ويراجع، والارخص ينفذ المهام الواضحة. ننتقل للاقوى بس لمن يفشل الفحص

وكل وكيل يشتغل على نسخة شغل منفصلة حتى الملفات ما تتعارض

واكو قاعدة تعلمتها ويا الوقت. اذا نفس المهمة فشلت مرتين حتى ويا الموديل الاقوى، فالخلل بخطتي مو بالوكيل

ارجع اقسم المهمة بدال ما اعيد المحاولة. واذا الفشل صار هواي فمعناها مهامي غامضة

وعن الشغل ويا الفريق البشري نفسه، بالمكتب لو ريموت، كتبت مقال ثاني

اقرا همبالمكتب لو من البيت لو مرن: ليش افضل الشغل المرنالفرق وطريقة العمل3 دقائق

الحد الجديد هو شكد تكدر تراجع

الي يوكفني اليوم مو عدد الوكلاء. يوكفني عدد المهام الي اكدر اراجعها بتركيز باليوم الواحد

لو شغلت عشر وكلاء وراجعت نتائجهم وانا تعبان، اكون ضفت اغلاط اكثر من الانجاز الي ضفته

لهذا اشغل ثلاثة لو اربعة وكلاء بنفس الوقت وما ازيد الا اذا مهامهم مستقلة تماما بملفاتها

الكلفة وين راحت ووين بقت

ما اكدر اكلك الكلفة نزلت للنص

ما عندي مقارنة مضبوطة لان المشروع الواحد ما ينبني مرتين، مرة بالطريقة القديمة ومرة بالجديدة

وبنود الكلفة نفسها تغيرت. الكتابة صارت ارخص وثلاث اشياء زاد وزنها: كتابة المهمة بوضوح والاختبار والمراجعة

وتعلمت من الهدر هم

اكبر هدر شفته كان وكيل جديد يقرا المشروع من اوله بكل مرة قبل ما يكتب سطر. حليتها بملف خلاصة ينكتب مرة وحدة لكل مشروع ويغني الوكيل عن اعادة الاستكشاف

والهدر الثاني كان استعمال الموديل الاقوى لكلشي

قواعد الامان

هاي القواعد تبين متشددة. بس الوكيل ينفذ بسرعة وبثقة، وغلطته على بيانات حقيقية توصل ابعد واسرع من غلطة بشرية عادية

منصة متاجر إلكترونيةمدارمنصة يفتح بيها التاجر العراقي متجره، ويدير طلباته وتوصيله وتحصيل فلوسه من مكان واحد.

شنو يعني هذا للمطور وللي يتعاقد وياه

شنو يتغير للمطور بالفريق

دور المطور يتحول من واحد يكتب كل سطر لواحد يحدد المهمة ويقرا النتيجة ويحكم عليها

وهذا يريدله خبرة اكثر مو اقل لان الي ما يقرا الكود زين ما يراجعه زين. ولهذا ما اشوف المبتدئ يستغني عن تعلم الاساسيات

والمهارة الي قيمتها تصعد هي انك تشرح المشكلة بدقة وبالعربي اول شي

الي يكتب مهمة واضحة لوكيل يكتب بنفس الدقة طلب لزميل لو لزبون

وانصح كل مطور يقرا الي يكتبه الوكيل مثل ما يقرا كود زميل ما يعرفه زين. يشك بيه بادب ويسال عن الحالات الصعبة

الوكيل ما يتضايق من الاسئلة، بس ما يجاوب عليها الا اذا سالته

شنو تسال مقدم الخدمة

اذا تعاقدت ويا فريق يستعمل الذكاء الاصطناعي، ما يهمك اي اداة يستعمل. يهمك شلون يتاكد من شغله

اسئلة تسالها قبل التعاقد

• منو يراجع الكود قبل الدمج وهو شخص غير الي كتبه لو لا
• وين الاختبارات وشنو يصير لو فشل واحد منها
• الوكيل يشتغل على بياناتي الحقيقية لو على نسخة معزولة
• وين مكتوبة القرارات واسبابها
• لو غاب الشخص الي كتب هذا الجزء، منو يكمله

الخلاصة

الذكاء الاصطناعي خلى الكتابة اسرع وارخص وما خلى الفهم والمسؤولية اسرع ولا ارخص

انصح الي يبني نظام يسال عن الفحص قبل ما يسال عن السرعة. السرعة بلا فحص توصلك للغلط اسرع