تعلم البرمجة بالعراق: الطريق الي أنصح بيه لو أبدي اليوم

سؤال يوصلني هواي: منين ابدي؟

الجواب الي ممكن انطيه اليوم يختلف عن الي كنت راح اكوله قبل كم سنة لان الادوات تغيرت. بس اكو شي واحد ما تغير: الي يتعلم البرمجة وهو يبني شي لشخص حقيقي يتقدم اسرع من الي يتعلمها وهو يشوف دروس

قاعدة قبل كل شي

لا تبدي بلغة ولا بفريمورك. ابدي بمشكلة صغيرة يم واحد تعرفه: جدول مخزن لمحل قريب، او صفحة حجز لعيادة، او منيو لمطعم

لمن تعرف شنو تريد تبني تصير اللغة اداة بيدك. وكل شي تتعلمه بعدها يصير جواب لسؤال واجهك فعلا

ابدي بمشكلة يم واحد تعرفه. اللغة تجي بعدها

ليش الدروس تخدعنا

لمن تشوف درس تحس انك تتقدم، لان كل شي بيه يشتغل وكل خطوة مفهومة. بعدين تفتح محرر الكود وحدك وتلكى كدامك صفحة فارغة

المسافة بين الحالتين هي الي لازم تتعلمه فعلا. وما يكطعها الا الي يبني بيده

ما اكلك عوف الدروس. شوف منها الي يحتاجه مشروعك وقت ما يحتاجه

اختار مشروعك الاول

المشروع الاول المناسب بيه اربع صفات:

• صغير تكدر تخلصه. المشروع الي ما يخلص ما يعلمك التسليم
• اله صاحب حقيقي يكلك نفعه لو لا
• بيه بيانات تنحفظ وتنعرض، مو صفحة ثابتة وبس
• من شغل تعرفه، مثل مطعم قريب او عيادة او محل بمنطقتك او مدرسة

الطريق مثل ما اشوفه

هاي الخطوات ما تحتاج فلوس هواي، تحتاج صبر. وما احط الها مدة لان كل واحد يمشيها بسرعته

1. اكتب صفحة ويب من الصفر

   HTML و CSS وشوية JavaScript. خليها عنك او عن مشروعك

2. ضيف الها بيانات

   قاعدة بيانات بسيطة تحفظ وتعرض، مثل قائمة منتجات او مواعيد

3. انشرها على دومين حقيقي

   هنا تتعلم الاستضافة والدومين، وتتعلم ان الشي الي محد يشوفه بعده ما خلص

4. خليها كدام مستخدم حقيقي

   راقبه وهو يستعملها وغير الي يحيره. هاي الخطوة تعلمك اكثر من اي كورس

5. تعلم عادات الفريق

   Git لادارة النسخ، وقراية كود كاتبه غيرك، وكتابة رسالة تغيير واضحة، واختبار بسيط

لغة وحدة بدل خمسة

انصح بـ JavaScript وبعدها TypeScript. والسبب عملي. تكتب بيها موقع وباك اند وتطبيق موبايل. والانظمة الي اشتغلت عليها بالفترة الاخيرة، مثل مدار وتعيين، اغلبها مبني على TypeScript

هي مو الاحسن بكل شي، بس تفتحلك ابواب اكثر بوقت اقل. والي يتقنها يتعلم لغة ثانية بسهولة لان نفس الافكار تتكرر

اقرا همسوق الوظائف التقنية بالعراق: شنو يدور عليه أصحاب العمل فعلاالسوق العراقي4 دقائق

جامعة لو كورس لو مشروع

انا مو ضد اي طريق من الثلاثة. كل واحد ينطيك شي وممكن ينقصه شي

الاحسن تجمع. اساس من واحد منهم وفوكه مشروع حقيقي

وعلى نفس هاي الفكرة قامت ثينكرا، منصة التعليم الي اشتغلت على اجزاء منها، ومنها تطبيق الموبايل والاختبارات والشهادات والدروس المباشرة. الكورسات المسجلة وحدها ما تكفي، والمتعلم يحتاج مدرب يساله ويتابعه

مهارات تبقى لمن الكل يكتب بالذكاء الاصطناعي

الادوات تتغير بسرعة. وهاي ثلاث مهارات اشوفها تبقى الها قيمة مهما كان الي يكتب الكود

خلي الذكاء الاصطناعي معلمك

انا اشتغل ويا وكلاء ذكاء اصطناعي كل يوم، واكتب الهم تعليمات بكل مشروع. الوكيل يكدر يكتب بدقايق الي كان ياخذ يوم

بس هذا ما يعني انك ما تحتاج تفهم. بالعكس، يرفع قيمة ثلاث اشياء: تعرف شنو تطلب، وتقرا الي انكتب وتحكم عليه، وتجربه قبل ما يوصل للمستخدم

تعلم البزنس ويا الكود

بصراحة، اهم شي تعلمته ما كان لغة برمجة. كان فهمي لشغل الي ابني له

المبرمج الي يكعد ويا صاحب المحل ويساله شلون يربح ووين يخسر، وبعدها يكتب الكود، يبني شي ينستعمل. ولمن الكل يصير يكتب كود بمساعدة الذكاء الاصطناعي، هاي المهارة هي الي تفرق مبرمج عن مبرمج

اقرا بالانكليزي من اول يوم

مو لان العربي بيه شي. المصدر الاول للمعلومة ينكتب بالانكليزي بالغالب، والي ينتظر الترجمة يبقى متاخر. وما تحتاج تتقنه، يكفي تقرا توثيق وتفهم رسالة خطا

وتعلم تقرا رسالة الخطا كاملة قبل ما تنسخها لاحد. نص الحل مكتوب بيها بالغالب، والي يتعود يقراها يوفر على نفسه ساعات

اعرض الي بنيته وقدم بثقة

المشروع الي محد يشوفه ما ينفعك يم صاحب العمل. اكتب لكل مشروع صفحة قصيرة: شنو المشكلة، ولمنو بنيته، وشنو بنيت، وشنو تعلمت، ورابط يفتحه القارئ

وهيچ اكتب صفحات المشاريع بهذا الموقع. المشكلة اول شي، بعدها الي انبنى، بعدها النتيجة

واذا محد استعمله غيرك كولها بصراحة. انك تذكر حدود مشروعك احسن من رقم تبالغ بيه

شلون تعرف انك تتقدم

ارجع لكود كتبته قبل كم اسبوع. اذا حسيت انك تكدر تحسنه، وان بعض الي بيه يخجلك شوية، فهاي خوش علامة. معناها عينك صارت ادق من قبل

التقدم يبين هنا قبل ما يبين باي شهادة

شوكت تقدم على وظيفة

ماكو يوم يجي بيه واحد ويكلك انت صرت جاهز. علامتي انا بسيطة: عندك مشروع يستعمله واحد غيرك، وتكدر تشرح ليش اخذت قراراتك بيه، وتفتح كود غيرك بدون خوف

اذا اجتمعت هاي الثلاثة قدم. ولا تنتظر تحس انك جاهز تماما، لان هذا الاحساس ما يجي

شنو الي يعطلك

اذكر هنا شغلتين تتكرر. ظروف التعلم نفسها، وعادات تخليك بمكانك

تعلم والنت يكطع

هواي من المتعلمين عندنا يدرسون على نت وكهرباء مو مستقرين. لا تخليها عذر. درب نفسك عليها. شغل سيرفر وقاعدة بيانات على حاسبتك، ونزل التوثيق الي تحتاجه، واشتغل على الشي الي ما يحتاج اتصال

وبالطريق راح تتعلم شلون يشتغل الي تبنيه من جوه

علامات انك تدور بمكانك

اذا لكيت وحدة منها وكف وابني شي

• خلصت كم كورس وما نشرت شي
• تبدل لغتك كل شهر لان لغة ثانية تبين احسن
• تنتظر كورس احسن قبل ما تبدي مشروعك
• تقارن نفسك بواحد عنده سنين خبرة

الخلاصة

ابدي بمشكلة صغيرة حقيقية، وابني حلها، وانشره، وخليه كدام مستخدم. كررها كم مرة وراح تلكى عندك شي تعرضه على صاحب العمل

هذا الطريق الي انصح بيه لو ابدي اليوم