بالمكتب لو من البيت لو مرن: ليش افضل الشغل المرن

سؤال يوصلني من اصحاب شركات ومن مطورين: وين لازم يشتغل الفريق التقني؟

اكو ثلاث طرق: عن بعد بالكامل، او دوام كامل بالمكتب ثمان ساعات، او شغل مرن بين الاثنين

انا مسؤول عن الجانب التقني بفريق بالبصرة، واشتغلت ضمن فرق على منصات مثل تعيين. الي راح اكتبه رايي من هاي التجربة، مو دراسة ولا قانون

ثلاث طرق للشغل

مشاكل الشغل عن بعد

بالاسابيع الاولى الشغل من البيت يبين حلم. بس ويا الوقت تطلع ثلاث مشاكل

يحتاج انضباط ذاتي

ماكو احد يشوفك. انت الي تبدي يومك وانت الي تسده، والبيت بيه الف شي يسحبك من الشغل

بعض الناس ينجحون بهذا من اول يوم، وهواي يتعبون بيه حتى لو ما يكولون

يخلق ملل

نفس الغرفة ونفس الشاشة كل يوم، والايام تصير تشبه بعضها

الملل ما يبين بالاسبوع الاول. يبين بعد اشهر، لمن يصير الشغل ثقيل بدون سبب واضح

يبعد الموظف عن الشركة

الموظف الي ما يلتقي زملائه يصير يشوف الشركة رسائل ومهام. ما يعرف ناسها ولا يحس انه جزء منها

وهذا يسهل عليه يطلع منها اول ما يجيه عرض ثاني، لان ماكو شي يربطه بيها غير الراتب

مشاكل الدوام الكامل بالمكتب

شغلنا ذهني. ساعات تركيز وحل مشاكل وقرارات صغيرة طول اليوم، وهذا وحده متعب

الدوام الكامل يضيف فوكه جهد بدني: الطريق والزحمة كل يوم، والكعدة ثمان ساعات بنفس المكان حتى لو الشغل خلص او ما يحتاج حضور

وكعدة ثمان ساعات ما تعني ثمان ساعات شغل. بعض اصحاب الشركات يريدون المكتب لانهم يريدون يشوفون الناس تشتغل. افهم هذا الشعور، بس ما اثق بالمقياس

ليش افضل الشغل المرن

الشغل المرن يعني تكون بالمكتب لمن يحتاج الامر، والشغل الي يخلص من البيت او من اي مكان ثاني انت حر تختار وين تسويه

شوكت لازم تكون بالمكتب

• الاجتماعات الداخلية الي تحتاج نقاش وقرار
• الاجتماع ويا العملاء
• الامور التنظيمية
• الاسابيع الاولى للي توه داخل الفريق

لقاء العميل بالذات ما اتنازل عنه. بالعراق الثقة تنبني بين الناس، والاتفاق ينحسم بالغالب على استكان چاي

وغير هذا، كتابة الكود والمراجعة والتخطيط تخلص من اي مكان هادي. والشخص اعرف من غيره وين يركز اكثر

مرونة كاملة مو ايام ثابتة

اكو شركات تقسم الاسبوع: يومين بالمكتب وثلاث بالبيت. هذا احسن من الدوام الكامل، بس ما افضله

الحاجة ما تمشي على جدول. اسبوع بيه ثلاث اجتماعات ويا عملاء، واسبوع كله شغل مركز ما يحتاج احد يطلع من بيته

اذا ثبتنا الايام راح نجي للمكتب بيوم ماكو بيه شي يحتاج حضور، ونكعد بالبيت بيوم كان لازم نكون بيه سوية

نحضر لمن الشغل يحتاجنا سوية، مو لان اليوم ثلاثاء

المرونة تحتاج وضوح

المرونة الكاملة ما تعني فوضى. حتى تنجح لازم الكل يعرف القواعد

1. حدد شنو يحتاج حضور

   الاجتماعات الداخلية ولقاء العملاء والامور التنظيمية. والباقي يخلص من اي مكان

2. بلغ بوقت كافي

   اي اجتماع يحتاج حضور ينعرف موعده قبل بوقت كافي، حتى كل واحد يرتب يومه

3. اكتب كل شي بمكان واحد

   المهام والقرارات والمستندات، حتى ما يبقى شي براس شخص واحد ويوكف الشغل لمن يغيب

4. قيس بالي يتسلم

   الاجزاء الي تشتغل بموعدها، مو ساعات الكعدة ولا مكانها

وبعد ما دخلوا وكلاء الذكاء الاصطناعي بالشغل صارت الكتابة اهم من قبل، لان الوكيل ما يسمع الي انكال بالغرفة. كتبت عن هذا مقال مستقل

اقرا همأدير مطورين ووكلاء أذكياء سوية: شنو الي تغير بالكلفة والسرعةالذكاء الاصطناعي4 دقائق

شنو يعني هذا لصاحب الشركة

اذا تتعاقد ويا فريق او مطور، فمكان شغله يهمك اقل من طريقة شغله. اسال شنو يكتبون وشنو يسلمون وشوكت تشوفه، واسال اذا تكدر تلتقي بيهم وقت القرارات الكبيرة

واذا عندك فريق، المكتب بعده مهم. بس دوره يتغير: مكان نلتقي بيه لمن نحتاج نلتقي، مو مكان نكعد بيه ثمان ساعات حتى نثبت اننا نشتغل

الخلاصة

الشغل عن بعد بالكامل يتعب الانضباط، وياخذ ملل، ويبعد الموظف عن الشركة. والدوام الكامل بالمكتب يتعب الجسم فوك الذهن

والشغل المرن ياخذ الزين من الاثنين: نلتقي لمن نحتاج نلتقي، وبباقي الوقت كل واحد يشتغل من المكان الي يرتاح بيه